من ده حافظ کیمی اعجازمسیحا ائله دیم
ترکی بیرچشمه ایسه،من اونی دریا ائله دیم .
بیرسویرق معرکه نی محشرکبرا ائله دیم.
بیرایشیلتیدی سها اولدوزی تک گورسنمز،
گوزیاشملا من اونی عقد ثریا ائله دیم .
امیدیم وارکه بودریا هله اقیانوس اولا،
اونا ضامن بوزمینه که مهیا ائله دیم.
عرفانا چاتماسا شعروادب ابقا اولماز،
من ده عرفانه چاتیب ،شعریمی ابقا ائله دیم.
ابدیتله یاناشدیم دوغولا حافظه تای ،
شیرازین شاهچراغین تبریزه اهدا ائله دیم.
ترکی نین جانینی آلمشدی حیاسز طاغوت،
من حیات آلدیم اونا،حق ایچون احیا ائله دیم.
(فیض روح القدس)اولدی مددیم حافظ تک ،
من ده حافظ کیمی اعجازمسیحا ائله دیم .
قمه قداره لرآغزیندا دیل اولمشدی سوگوش،
من سه وینج ائتدیم اونی،خنجری خرما ائله دیم .
ایندی گویلرده گوزل صفله صفا ایله گزیر،
منجلابلاردا اوزن اردگی دورنا ائله دیم.
باخ که (حیدر بابا)افسانه تک اولموش بیرقاف،
من کیچیک بیر داغی سر منزل عنقا ائله دیم.
بوردا(روشن ضمیرین)ده هنرین یاد ائده لیم،
من انوندا قلمین طوطی گویاائله دیم،
نه تک ایراندا منیم ولوله سالمیش قلمیم،
باخ که ترکیه ده،قافقازدا نه غوغا ائله دیم.
باخ که تهراندا نه فرزانه لر اولموش واله،
باخ که تبریزده نه شاعرلری شیدا ائله دیم .
هم (سهندیه)سهندین داغین ائتدی باش اوجا،
هم من ئوزقارداشیمین حقینی ایفا ائله دیم .
آجی دیللرده شیرین ترکی اولوردی حنظل ،
من شیرین دیللره قاتدیم اونی حلوا ائله دیم.
هرنه قالمیشدی کئچنلردن اونا بال پتگی،
اریدیب موملو بالین شهد مصفا ائله دیم.
ترکی،واللاه، آنالار اوخشاغی، لایلای دیلی دیر،
دردیمی من بودوا ایله مداوا ائله دیم،
شهریار،حیف ساووخدیر بو دگیر مان هله ده،
دارتماغا یوخدی دنی، من مدارا ائله دیم.